: पुणे : आयपीएलचा दुसरा टप्पा महिनाभरावर येऊन ठेपला असताना धोनी अनोख्या अवतारात दिसला आहे. धोनीचा असा अंदाज यापूर्वी कधीही पाहिला नव्हता. त्यामुळे सध्या त्याच्या या नव्या लूकची जोरदार चर्चा सुरू झाली आहे. ब्रॉडकास्टर स्टार स्पोर्ट्सने धोनीच्या या नव्या अवताराची झलक सादर केली आहे. स्टार स्पोर्ट्सने धोनीचा एक नवीन फोटो ट्विट केला आहे. 'व्हिवो आयपीएलच्या आधी धोनी काहीतरी नवीन करण्याची तयारी करत आहे. खरं चित्र पाहण्यासाठी संपर्कात राहा. #असली पिक्चर अभी बाकी है.' या चित्रात धोनी हिप हॉप स्टारच्या लूकमध्ये दिसत आहे. त्याचे केस स्पाइक्स केले असून त्यांना सोनेरी-पांढरा रंगही देण्यात आला आहे. तसेच त्याने फंकी जांभळा कुर्ता घातला आहे. तसेच त्याच्या हातात एक कडेही दिसत आहे. फोटोवरून असं दिसतंय की, स्टार स्पोर्ट्सने आयपीएल २०२१ च्या दुसऱ्या सहामाहीचा प्रोमो तयार केला आहे. पूर्वीप्रमाणे या वेळीही या स्पर्धेचा प्रचार-प्रसार धोनीच्या माध्यमातून केला जाईल. चेन्नई सुपर किंग्ज या देशातील सर्वाधिक चाहते असणाऱ्या संघाचा कर्णधार लवकरच क्रिकेटच्या मैदानात दिसणार आहे. एप्रिल-मे महिन्यात धोनी मैदानात खेळताना दिसला होता. त्यानंतर कोरोनाच्या वाढत्या प्रकरणांमुळे ही स्पर्धा स्थगित करण्यात आली होती. या स्पर्धेचे उर्वरीत सामने आता यूएईत खेळवले जाणार आहेत. पुढील महिन्यात आयपीएलचा दुसरा टप्पा सुरू होणार आहे. चांगल्या फॉर्ममध्ये आहे चेन्नई आयपीएल २०२१ चा दुसरा टप्पा चेन्नई सुपर किंग्ज आणि मुंबई इंडियन्स यांच्यातील सामन्याने सुरू होईल. जेव्हा स्पर्धा थांबवण्यात आली, तेव्हा चेन्नई गुणतालिकेत दुसऱ्या क्रमांकावर होता. त्यांनी सात पैकी पाच सामने जिंकले आहेत. धोनीच्या टीमला उत्तरार्धातही अशीच कामगिरी करून प्लेऑफचे तिकीट मिळवायचे आहे. गेल्या वर्षी जेव्हा यूएईमध्ये आयपीएल झाली, तेव्हा सीएसके सातव्या क्रमांकावर राहिली आणि इतिहासात प्रथमच प्लेऑफमध्ये स्थान मिळवण्यात अपयशी ठरली होती. यंदा आयपीएलमध्ये धोनीची कामगिरी खूपच खराब झाली आहे. त्याला सात सामन्यांत फक्त ३७ धावाच करता आल्या. १८ ही त्याची सर्वोच्च धावसंख्या आहे. त्याचा स्ट्राइक रेट देखील १२३.३३ आहे.
