म.टा. प्रतिनिधी, गुप्तांग व पोटात पाकिटे लपवून सोन्याची तस्करी करणाऱ्या तीन महिलांना छत्रपती शिवाजी महाराज आंतरराष्ट्रीय विमानतळावर अटक करण्यात आली आहे. या तिन्ही महिला केनियाच्या नागरिक आहेत. केनियाच्या तीन महिला शरीरात काही तरी वस्तू लपवून दोहा येथून मुंबईत आणत असल्याची गुप्त माहिती नार्कोटिक्स कंट्रोल ब्युरोला (एनसीबी) त्यांच्या खबरींकडून मिळाली. त्यानुसार एनसीबीच्या मुंबई प्रादेशिक संचालनालयाने समीर वानखेडे यांच्या मार्गदर्शनाखाली विमानतळावर सापळा वचून मोहम्मद कुरेशा अली (वय ६१ वर्षे), अब्दुल्लाही अब्दिया अदान (४३ वर्षे) व अली सादिया अल्लो (वय ४५ वर्षे) या तिघींना ताब्यात घेतले. त्यांच्या तपासणीत काहीच सापडले नाही. परंतु अधिक विचारणा करताच या महिलांनी त्यांना अस्वस्थ वाटत असल्याचे सांगितले. त्यामुळे त्यांना जेजे रुग्णालयात नेले गेले. त्यावेळी वैद्यकीय तपासणीत या महिलांनी पोटात व गुप्तांग भागात पाकिटे लपवली असल्याचे सांगितले. डॉक्टरांनी सर्व प्रकारची वैद्यकीय काळजी घेत, ही पाकिटे बाहेर काढली. तपासणी केली असता अशी एकूण १३ पाकिटे होती. त्यामध्ये २० ग्रॅमपासून ते १०० ग्रॅम वजनापर्यंतचे सोन्याचे १७ तुकडे होते. त्यांचे एकूण वजन ९३७.७८ ग्रॅम इतके होते. समीर वानखेडे यांनी सांगितले की, 'एनसीबी सोन्याच्या तस्करीचे प्रकरण हाताळत नाही. त्यामुळे हे प्रकरण सीमा शुल्क विभागाकडे सोपविण्यात आले. परंतु अमली पदार्थ असो वा सोने किंवा अन्य कुठलीही तस्करी, सरकारी महसुलाचे नुकसान टाळण्यासाठी एनसीबी असेच डोळ्यात तेल घालून काम करीत राहिल. ही विमानतळावरील अशाप्रकारची दुसरी घटना असून याआधी एका महिलेकडून अमली पदार्थांची पाकिटे जप्त करण्यात आली होती.'
