म. टा. विशेष प्रतिनिधी, पाच दिवस न जाणारा संसर्गजन्य ताप, अंगदुखी, डोकेदुखीनंतर येणारा ताप, सर्दी खोकला अशा तापाच्या वेगवेगळ्या प्रकारांनी त्रासलेल्या मुंबईकरांना एकच दिवस मुदतीचा ताप आता त्रासदायक ठरत आहे. खासगी व सार्वजनिक रुग्णालयांच्या ओपीडीमध्ये येणाऱ्या काही रुग्णांनी एकच दिवस ताप आल्याची व तो शंभरच्या पुढे असल्याचे सांगितले आहे. हा ताप येऊन गेल्यानंतर पुढील आठ ते दहा दिवस थकवा होता असेही या रुग्णांनी सांगितले. अशा रुग्णांचे प्रमाण वाढत असल्याचे संसर्गजन्य आजाराचे तज्ज्ञ डॉ. एम. एम. वाघमारे यांनी सांगितले. अनेकजण एकच दिवस ताप आल्यामुळे या करोना चाचण्या करण्याचे टाळतात. काही रुग्णांनी एक दिवस ताप येऊन गेल्यानंतर पुढील आठवडाभर चव व गंध येत नसल्याचेही सांगितले. डेंग्यू व मलेरियाच्या रुग्णांची संख्या वाढली आहे. काही रुग्ण घरी ताप अंगावर काढतात व डॉक्टर ओरडतील या भीतीने पूर्ण माहिती देत नाहीत. त्यामुळे या नव्या प्रकारातील लक्षणांचा अभ्यास करण्याची गरज आहे, असे फिजिशिअन डॉ. मणिलाल मोता यांनी सांगितले.
