नवी दिल्ली: शनिवारी टोकियो ऑलिम्पिकमधील अॅथलेटिक्स स्पर्धेतील महिलांच्या थाळीफेकमध्ये भारताच्या कमलप्रीत कौर( )ने अंतिम फेरी गाठली. कमलप्रीतने पहिल्या प्रयत्नात ६०.२९ मी., दुसऱ्या प्रयत्नात ६३.९७ मी. आणि तिसऱ्या प्रयत्नात ६४ मीटर कामगिरी नोंदविली. अंतिम फेरीसाठी पात्र ठरलेल्यामध्ये कमलप्रीत दुसऱ्या क्रमांकावर आहे. यामुळे संपूर्ण देशवासियांच्या तिच्याकडून पदकाच्या आशा निर्माण झाल्या आहेत. करोना साथरोगामुळे लावण्यात आलेल्या लॉकडाउनचा थाळीफेकपटू कमलप्रीत कौरवर विपरित परिणाम झाला होता. तिच्या मानसिक स्वास्थ्यावर एवढा परिणाम झाला होता, की त्यातून बाहेर पडण्यासाठी तिने क्रिकेट खेळायला सुरुवात केली होती. मात्र, थाळीफेक हे तिचे पहिले प्रेम राहिले. शनिवारी २५ वर्षीय कमलप्रीतने थाळीफेकमध्येच ६४ मीटर कामगिरी नोंदवून अंतिम फेरीतील प्रवेश निश्चित केला. आता ती २ ऑगस्टला होणाऱ्या अंतिम फेरीत कौशल्य पणाला लावणार आहे. वाचा- पंजाबमधील काबरवाला गावात शेतकरी कुटुंबात जन्मलेल्या कमलप्रीत गेल्या वर्षी लॉकडाउनमुळे नैराश्यात अडकली होती. कारण, लॉकडाउनमुळे तिला स्पर्धा खेळायला मिळत नव्हत्या. तिच्या प्रशिक्षिका राखी त्यागी म्हणाल्या, ‘कमलप्रीतच्या गावाजवळ बादलमध्ये भारतीय क्रीडा प्राधिकरणाचे (साइ) केंद्र आहे. तिथेच आम्ही २०१४पासून गेल्या वर्षापर्यंत सराव करीत होतो. मात्र, करोनामुळे सर्वकाही बंद झाले आणि त्यामुळे गेल्या वर्षी नैराश्य आल्यासारखे झाले होते. तिला स्पर्धा खेळायच्या होत्या. विशेषकरून तिला ऑलिम्पिकमध्ये खेळायचे होते. तिला अस्वस्थ वाटत होते. हे खरे आहे, की तिने क्रिकेट खेळायला सुरुवात केली. मात्र, ती स्पर्धेसाठी किंवा प्रोफेशनल क्रिकेटपटू होण्यासाठी खेळत नव्हती. केवळ ती आपल्या गावात क्रिकेट खेळत होती.’ साइच्या प्रशिक्षिका त्यागी या कमलप्रीतसोबत ऑलिम्पिकसाठी टोकियोला जाऊ शकल्या नाहीत. वाचा- रेल्वेची कर्मचारी असलेल्या कमलप्रीतने या वर्षी चांगली कामगिरी केली आहे. तिने मार्चमध्ये फेडरेशन कपमध्ये ६५.०६ मीटर कामगिरी नोंदविली होती. यासह तिने राष्ट्रीय विक्रमही रचला होता. थाळीफेकमध्ये ६५ मीटर कामगिरी नोंदविणारी ती पहिलीच भारतीय महिला खेळाडू ठरली. जूनमध्ये झालेल्या इंडियन ग्रांप्रीमध्ये कमलप्रीतने ६६.५९ मीटर कामगिरी नोंदवून नवा विक्रम प्रस्थापित केला होता. यासह जगात सहाव्या क्रमांकावर पोचली होती. वाचा- गरिबी अन् आईचा विरोध घरची गरिबी आणि सुरुवातीला आईच्या विरोधामुळे अॅथलेटिक्समध्ये येणार नव्हती. मात्र, वडील कुलदीपसिंग यांच्या प्रोत्साहनामुळे ती या खेळात आली. सुरुवातीला ती गोळाफेक करीत होती. मात्र, बादल येथील साइ केंद्रात दाखल झाल्यानंतर तिने थाळीफेक करण्यास सुरुवात केली. वाचा- पदकासाठी सर्वतोपरी प्रयत्न करीन : कमलप्रीत टोकियो ऑलिम्पिकमधील महिलांच्या थाळीफेकमध्ये अंतिम फेरी गाठणाऱ्या कमलप्रीत कौरने पदक जिंकण्यासाठी सर्वतोपरी प्रयत्न करणार असल्याचे आपल्या वडिलांना सांगितले. कमलप्रीतचे वडील कुलदीपसिंग म्हणाले, ‘मी आज तिच्याशी बोललो आणि ती खूप खुश होती. अंतिम फेरीत मी आपली सर्वोत्तम कामगिरी करेन, असे तिने मला सांगितले. तिने नेहमीच आपल्या खेळावर लक्ष केंद्रित केले आहे. कठोर मेहनतीमुळेच तिने ऑलिम्पिकमध्ये सहभागी होण्याचे आपले स्वप्न साकार केले आहे.’ पंजाबचे क्रीडामंत्री राणा गुरमितसिंग सोधी यांनी कमलप्रीतचे अभिनंदन केले. ‘अंतिम फेरी गाठल्याबद्दल अभिनंदन. आम्हाला तुझा अभिमान वाटतो. अशीच लय कायम ठेव. मला विश्वास आहे, की तू शानदार कामगिरी करून पदक जिंकशील,’ असे ट्वीट त्यांनी केले आहे. - कमलप्रीतने ६४ मी. कामगिरी नोंदविली. ही पात्रता फेरीतील दुसऱ्या क्रमांकाची कामगिरी ठरली. - पात्रता फेरीत अमेरिकेची व्हॅलेरी ऑलमन अव्वल स्थानावर राहिली. तिने ६६.४२ मीटर कामगिरी नोंदविली. ही कामगिरी तिने पहिल्याच प्रयत्नात नोंदविली होती. - या वर्षी महिला थाळीफेकमध्ये सर्वोत्तम कामगिरी नोंदविणाऱ्या खेळाडूंत कमलप्रीत (६६.५९ मी.) सहाव्या स्थानावर आहे. पहिल्या क्रमांकावर जॉरिंदे क्लिनक्लेन (७०.२२ मी.) आहे. त्यापाठोपाठ व्हॅलेरी ऑलमन (७०.०१ मी.), याइमी पेरेझ (६८.९९ मी.), सँड्रा पेरकोविच (६८.३१ मी.), शादाए लॉरेन्स (६७.०५ मी.) या खेळाडू आहेत. यातील क्लिनक्लेन अंतिम फेरीसाठी पात्र ठरू शकली नाही. मात्र, अंतिम फेरीत पेरेझ, ऑलमन, पेरकोविच आणि लॉरेन्स यांचे आव्हान असणार आहे.
