काबूल: रविवारी तालिबानने काबूलवर ताबा मिळवला. त्यानंतर मागील २० वर्षांपासूनचे लोकनियुक्त अफगाण सरकार सत्तेतून पायउतार झाले. तालिबानने काबूलमध्ये शिरकाव केल्यानंतर हजारो नागरिकांनी देश सोडण्यासाठी प्रयत्न सुरू केले. तालिबानकडे सत्ता हस्तांतरीत झाल्याचे वृत्त समोर येताच काबूल विमानतळावर मोठी गर्दी उसळली. विमानतळ परिसरात गोळीबाराचे आवाज ऐकू आले. विमानतळावरील दृष्ये व्हायरल होत आहे. तालिबानने सत्ता हाती घेतल्यानंतर रात्रीच्या सुमारास काबूलमधील जवळपास सर्वच भागाचा ताबा घेतला. तालिबान राजवटीच्या भीतीने हजारो नागरिकांनी पलायन करण्यासाठी काबूल विमानतळावर गर्दी केली होती. विमानतळावर कोणत्याच प्रकारची सुरक्षा व्यवस्था नसल्याने मोठा गोंधळ उडाला होता. राष्ट्रपती गनी यांनी देश सोडला दरम्यान, रविवारी तालिबानने काबूलचा ताबा घेतल्यानंतर राष्ट्रपती अशरफ गनी यांनी तालिबानकडे सत्ता हस्तांतरीत केली. त्यानंतर गनी आणि त्यांच्या काही सहकाऱ्यांनी देश सोडला असल्याचे वृत्त समोर आले आहे. काबूलमध्ये हिंसाचार नको यासाठी आपण तालिबानकडे सत्ता सोपवली असल्याचे गनी यांनी म्हटले. तालिबान काबूलवर हल्ला करण्यास सज्ज होते. मात्र, नागरिकांच्या सुरक्षितेसाठी हा निर्णय घेतल्याचे गनी यांनी म्हटले.
