नवी दिल्लीः काबुल विमानतळावर अडकलेल्या १६८ भारतीयांना घेऊन हवाई दलाचे सी-१७ ग्लोबमास्ट हे वाहतूक विमान सुरक्षित देशात पोहोचले आहे. हे विमान सकाळी १० वाजता गाझियाबादमधील हिंडन हवाई तळावर उतरले. यात अफगाणिस्तानच्या दोन खासदारांचा समावेश आहे. यात तालिबान विरोधात आवाज उठवण्याऱ्या खासदार अनारकली यांचाही समावेश आहे. तसंच २४ अफगाण शिखांचाही समावेश आहे. तालिबानने अफगाणिस्तानवर कब्जा केल्यानंतर तिथे अडकलेल्या भारतीयांना विशेष विमानांद्वारे मायदेशात आणलं जात आहे. अनेक विदेशी नागरिकही असुरक्षेमुळे भारतात येत आहेत. यापूर्वी दिल्लीच्या इंदिरा गांधी आंतरराष्ट्रीय विमानतळावर काबुलहून ३ विमानं आली. ही विमानं दोहा, ताजिकिस्तानहून भारतात आली. एक विमान विस्तारा आणि दुसरे एअर इंडिया आणि तिसरे इंडिगो एअरलाइन्सचे आहे. ही सर्व विमानं पहाटे ४.३० ते ६ वाजेदरम्यान आली. इंडियोग आणि एअर इंडियाच्या विमानांद्वारे एकूण २५० भारतीयांना मायदेशात आणण्यात आलं. भारतात आलेल्या सर्व प्रवाशांची आरटी-पीसीआर चाचणी केली जाईल. त्यानंतरच त्यांना विमानतळाच्या बाहेर सोडलं जाणार आहे. परराष्ट्र मंत्रालयाचे प्रवक्ते अरिंदम बागची यांनी काबुलमधून येणाऱ्या भारतीयांबाबत ट्वीटद्वारे माहिती दिली. त्यांनी एक व्हिडिओ क्लीपही पोस्ट केली. ज्यात काबुलमधून बाहेर काढण्यात आलेले नागरिक हे 'भारत माता की जय'च्या घोषणा देत होते. काबुलमधून नागरिकांना बाहेर काढण्याची प्रक्रिया पुढेही सुरू राहील, असं बागची यांनी सांगितलं.
