म. टा. प्रतिनिधी, मुंबईः छत्रपती शिवाजी महाराज आंतरराष्ट्रीय विमानतळावरील स्वयंचलित बॅगपट्ट्यावर एक चिमुकला चढल्याने गोंधळ उडाला. हा मुलगा आतमध्ये जाऊन गुदमरण्याची भीती निर्माण झाली असतानाच हा पट्टा चालविणाऱ्या ऑपरेटरच्या प्रसंगावधानामुळे मोठा अपघात टळला. आपला प्रवास संपवून विमानतळावर प्रवासी आले, की त्यांचे विमानातील सामान एका स्वयंचलित पट्ट्याद्वारे त्यांना घेता येते. 'रिक्लेमर बेल्ट' असे त्याला संबोधले जाते. एक चार वर्षांचा चिमुकला उदयपूरहून त्याच्या आई-वडिलांसह आला. आई-वडील अन्य कामात व्यग्र होते. त्याचवेळी हा चिमुकला मस्ती करत या 'रिक्लेमर बेल्ट'वर चढला. हा पट्टा प्रवाशांच्या सामानासह वेगाने फिरत होता. मुख्य म्हणजे हा पट्टा एका लहान बंदिस्त अशा कक्षात जातो व तिथून पुन्हा बाहेर येतो. चिमुकला या पट्ट्यावर ज्या भागात चढला, तिथून तो कक्ष जवळच होता. त्यामुळे अवघ्या काही सेकंदात तो चिमुकला त्या बंदिस्त कक्षात जाऊन गुदमरण्याची भीती निर्माण झाली. काही सेकंदात घडलेल्या या घटनेमुळे विमानतळाच्या आगमन भागात प्रचंड गोंधळ उडाला. हा गोंधळ नीरज निंबाळकर या कर्मचाऱ्यास दिसला. त्या स्वयंचलित पट्ट्याचे कार्यान्वयन निंबाळकर करीत होते. त्यांनी क्षणाचाही विलंब न करता, न गोंधळता प्रसंगावधान राखत तत्काळ तो पट्टा बंद केला. पट्टा बंद करून त्याच क्षणी आपत्कालीन चमूला देखील पाचारण करण्यात आले. अखेर त्या चिमुकल्याला खाली उतरविण्यात आले व पालकांच्या स्वाधीन करण्यात आले. दोन सेंकदांचा विलंब झाला असता तरी, तो चिमुकला भीषण संकटात सापडण्याची भीती होती.
