म. टा. प्रतिनिधी मुंबई: चर्चगेट ते विरार दरम्यान धावणाऱ्या एसी लोकलमध्ये प्रचंड गर्दी असते. या गर्दीच्या रेट्यामुळे दरवाजावरील रबर निसटल्याने सोमवारी अंधेरी ते भाईंदर दरम्यान लोकल दरवाजे उघडे ठेवून धावली. या घटनेचा व्हिडीओ समाज माध्यमावर व्हायरल झाला होता. सोमवारी सायंकाळी सव्वा सहा वाजण्याच्या सुमारास चर्चगेटहून एसी लोकल रवाना झाली. ही विरार लोकल असल्याने या गाडीला प्रचंड गर्दी होते. या गाडीचे अंधेरी स्थानकात दरवाजे उघडेच राहिले. याची माहिती रेल्वे कर्मचाऱ्यांच्या माध्यमाने रेल्वेच्या नियंत्रण कक्षाला मिळाली. गर्दीची वेळ असल्याने रेल्वे कर्मचाऱ्यांनी अंधेरी स्थानकातच गाडीत प्रवेश करत दुरुस्ती काम सुरू केले. दरवाजा बंद करणारे गॅसकीट रबर दरवाज्यावरून निसटले आणि ते दरवाज्यात अडकले. यामुळे दरवाजे स्वयंचलित पद्धतीने उघड-बंद होऊ शकले नाही. अखेर भाईंदर स्थानकात अडकलेले रबर काढून पुन्हा एकदा स्वयंचलित पद्धतीने हे दरवाजे कार्यान्वित झाले, अशी माहिती रेल्वे अधिकाऱ्यांनी दिली. उपाय शोधण्याचे आदेश ‘गर्दीच्या वेळेत एसी लोकलमध्ये प्रवेश करताना रबरला पकडून प्रवासी लोकलमध्ये प्रवेश करतात. अनेकदा गर्दीच्या रेट्यामुळे दरवाज्याच्या टोकावर असलेले रबर निसटण्याची शक्यता आहे. भविष्यात या घटना घडू नये यासाठी गॅसकीट रबरला अतिरिक्त बळकटी देण्यासाठी उपाय शोधण्याचे आदेश देण्यात आले आहे’, असे ही पश्चिम रेल्वेतील अधिकाऱ्यांनी स्पष्ट केले. मध्य रेल्वेवरही असाच प्रकार मध्य रेल्वेवरील छत्रपती शिवाजी महाराज टर्मिनस ते ठाणे दरम्यान धावणाऱ्या लोकलचे दरवाजे उघडले न गेल्याची घटना घडली होती. १६ सप्टेंबरला रात्री ११.४३ ला ठाणे स्थानकात हा प्रकार झाला होता. कळवा कारशेडमध्ये दुरुस्तीनंतर स्वयंचलित पद्धतीने दरवाजे उघड-बंद सुरू झाले.
