मुंबई : धनत्रयोदशीला, शनिवारी सोनेचांदी खरेदीसाठी बाजारात ग्राहकांचा उत्साह दिसल्याने दिवाळीचा प्रारंभ सोनेरी झाल्याचे समाधान व्यापारी वर्तुळात व्यक्त होत आहे. कालचा शनिवार व आजचा रविवार असे दोन दिवस मिळून सोनेचांदीची खरेदी गेल्या वर्षीच्या तुलनेत २० टक्के अधिक होईल, असा व्यापाऱ्यांचा अंदाज आहे. शनिवार, रविवार असे सुट्टीचे दिवस आल्याने खरेदीला अधिक जोर आहे. सोन्याची नाणी, मंगळसूत्र, ब्रेसलेट, साखळ्या यांच्या खरेदीचे प्रमाण अधिक आहे, असे सांगण्यात आले. वर्षभरातील खरेदीचा सर्वात मोठा हंगाम दिवाळी असतो आणि दिवाळी खरेदीतील सर्वात मोठा दिवस धनत्रयोदशीचा असतो. या धनत्रयोदशीच्या मुहूर्तावरील खरेदी यंदा दोन दिवस आहे. त्यामुळे यंदा देशभरातील हा बाजार तब्बल ४० हजार कोटी रुपयांचा असल्याचा विश्वास अखिल भारतीय व्यापारी महासंघ (कॅट) या व्यापाऱ्यांच्या सर्वात मोठ्या संघटनेने व्यक्त केला आहे. धनत्रयोदशीला पिवळा धातू खरेदी करण्याची परंपरा आहे. या दिवशी अशाप्रकारची खरेदी शुभ मानली जाते. पूर्वी या निमित्ताने पितळी वस्तूची खरेदी होत असे. त्यानंतर सोन्याची खरेदी होऊ लागली. आता गरजेच्या वस्तूंची खरेदीदेखील या निमित्ताने केली जाते. मागील दोन वर्षे करोना संकटामुळे हा खरेदीचा उत्साह बाजारात फारसा नव्हता. पण, यंदाची दिवाळी करोना निर्बंधमुक्त आहे. त्यामुळे बाजारात आगळा उत्साह आहे. याबाबत ‘कॅट’चे महाराष्ट्र सरचिटणीस शंकर ठक्कर यांनी सांगितले की, ‘यंदा दिवाळीला करोनाचे निर्बंध नाहीत. त्यामुळे दोन वर्षांत होऊ न शकलेली हौसेची आणि गरजेची, अशा दोन्ही प्रकारची खरेदी ग्राहकांकडून यथाशक्ती सुरू आहे. यामुळे मंदीच्या चर्चेवर मात झाली आहे. नव्या कपड्यांपासून ते इलेक्ट्रॉनिक्स वस्तू, दुचाकीपासून ते चारचाकी, मोबाइल, लॅपटॉप, सोने-चांदीचे दागिने अशा सर्वांचीच दमदार खरेदी ग्राहकांकडून सुरू आहे. मागील वर्षीच्या तुलनेत यात किमान २५ टक्क्यांची वाढ आहे. देशभरातील या उलाढालीचा हा आकडा किमान ४० हजार कोटी रुपयांच्या घरात आहे, हे निश्चित.’ ‘कॅट’ने देशभरात ४० हजार कोटी रुपये उलाढालीचा अंदाज बांधला असताना, आर्थिक राजधानी मुंबईचा वाटा त्यात १२ ते १५ टक्के आहे. ‘कॅट’नुसार यंदा धनत्रयोदशी खरेदीचा मुहूर्त यंदा दोन दिवस आहे. यामध्ये शनिवारी २५ हजार तर रविवारी १५ हजार कोटी रुपयांच्या उलाढालीच्या दिशेने बाजार जात आहे. मुख्य म्हणजे, यामध्ये सर्वाधिक खरेदी स्वदेशी अर्थात भारतीय कंपन्यांनी तयार केलेल्या व ऑनलाइनपेक्षा बाजारात जाऊन खरेदी होत आहे. दरवर्षी चिनी वस्तूंचा बाजार ३५ ते ४० टक्के असे. यंदा तो पाच टक्क्यांहून खाली आल्याचे व्यापाऱ्यांचे म्हणणे आहे.
