म. टा. प्रतिनिधी, मुंबई : मुंबईतील बहुतांश रेल्वे स्थानकांमध्ये कालानुरूप प्रवाशांचा ताण वाढला आहे. त्यामुळे मुंबई रेल्वे विकास महामंडळाने 'एमयूटीपी ३ अ' अंतर्गत मुंबई रेल्वेवरील कांदिवली, मिरारोड, कसारा, नेरळ या चार रेल्वे स्थानकांवर सुधारणेचे काम हाती घेतले आहे. दिवाळीनंतर प्रत्यक्ष काम सुरू होणार असून; सन २०२४च्या निवडणुकांपूर्वी रेल्वे प्रवाशांना या सुविधा उपलब्ध होतील. स्थानक सुधारणांमध्ये प्रशस्त डेक, पूर्व-पश्चिम जोडणारे पूल, प्रवासी मागणीनुसार तिकीट खिडक्या, अन्य प्रवासी सुविधा, सुनियोजित प्रवेश-निर्गम या सुविधांचा समावेश आहे. बोरिवली स्थानकाच्या धर्तीवर या सुधारणा असतील. कांदिवली स्थानकाच्या पश्चिम दिशेला १०.३ मीटर रुंदीचा प्रशस्त डेक उभारण्यात येईल. सर्व पादचारी पुलांची याला जोडणी असेल. यासाठी उत्तर दिशेकडील ६ मीटर रुंदीच्या पादचारी पुलाचा आणि मध्यभागी असलेल्या ४ मीटर रुंदीच्या पुलाचा विस्तार होणार आहे. मिरारोड स्थानकात ११ मीटर रुंदीचा डेक उभारण्यात येणार आहे. सध्याचे तिकीटघर, आरक्षण कार्यालय, रेल्वे कार्यालय अन्यत्र हलवले जाणार आहेत. १० मीटर रुंदीच्या पुलाला स्कायवॉकची जोडणी देण्यात येईल. या दोन्ही स्थानकांसाठी १२५ कोटी रुपये खर्च निश्चित करण्यात आला आहे. 'एमयूटीपी ३ अ' या प्रकल्पसंचातील स्थानक सुधारणा या प्रकल्पात १९ रेल्वे स्थानकांचा समावेश आहे. मार्च २०१९मध्ये हा प्रकल्प मंजूर झाला. करोनामुळे हा प्रकल्पसंच मागे पडला होता. स्थानक सुधारणेतील चार स्थानकांच्या प्रत्यक्ष कामाला सुरुवात होणार असल्याने रेल्वे स्थानकांचे रूपडे बदलण्याची क्षमता असलेला हा प्रकल्पसंच आकार घेणार आहे. एमयूटीपी ३ अ, स्थानक सुधारणा प्रकल्पातील चार स्थानकांचे काम दिवाळीनंतर सुरू होईल. ३६ महिन्यांत चारही स्थानकांतील कामे पूर्ण होतील. मात्र काही सुविधा १८ महिन्यांतच प्रवाशांना वापरण्यास उपलब्ध होतील. - सुभाषचंद गुप्ता, अध्यक्ष आणि व्यवस्थापकीय संचालक, मुंबई रेल्वे विकास महामंडळ कसारा-नेरळ स्थानक सुधारणा - खर्च ११० कोटी कसारा : १० मीटर रुंदीचा पूल आणि पूर्व-दक्षिण दिशेला जोडणारा स्कायवॉक, उन्नत तिकीट आरक्षण कार्यालयालादेखील हा जोडण्यात येईल. पादचारी पुलाला चार मीटर रुंदीच्या स्कयवॉकची जोडणी. तळ मजल्यावर नवे आरक्षण कार्यालय. नेरळ : कर्जत दिशेला ६ मीटर रुंदीचा डेक आणि त्याला फलाट क्रमांक एकची जोडणी, कल्याण दिशेला ६ मीटर रुंदीचा पूल, रेल्वे कार्यालय, वाहनतळ, आरक्षण कार्यालय यांची नव्या जागेत उभारणी.
