म. टा. खास प्रतिनिधी, मुंबई : वीजबिल भरायचे बाकी आहे किंवा अद्ययावत केलेले नाही, असे संदेश पाठवून वीज जोडणी तोडण्याची धमकी देऊन नागरिकांची फसवणूक करण्याच्या घटना वाढल्या असतानाच मुंबई पोलिसांनी झारखंडमधून दोघांना अटक केली. या दोघांकडून पोलिसांनी डझनभर सिमकार्ड हस्तगत केली असून त्यांनी अशा पद्धतीने अनेकांना फसविल्याचे पोलिसांनी म्हटले आहे. वांद्रे येथील एका व्यक्तीच्या मोबाइलवर १७ नोव्हेंबरला वीजबिलासंदर्भात एक संदेश आला. यामध्ये वीजबिलाचा भरणा केला नसल्याने रात्री वीज जोडणी तोडण्यात येणार आहे, असे नमूद करण्यात आले होते. बिल भरले असताना असा संदेश का आला, याबाबत विचारणा करण्यासाठी या व्यक्तीने संदेश आलेल्या मोबाइल क्रमांकावर संपर्क केला. त्याने भरलेले बिल अद्ययावत करण्यासाठी लिंकवर जाऊन १० रुपये पाठविण्यास सांगितले. १० रुपये पाठविण्याच्या प्रयत्नांत संबंधित कथित अधिकाऱ्याने ५५ हजार रुपये परस्पर काढून घेतले. फसवणूक झाल्याचे लक्षात येताच त्यांनी लगेच पोलिस ठाण्यात तक्रार केली. वांद्रे-कुर्ला संकुल पोलिस ठाण्याचे वरिष्ठ पोलिस निरीक्षक विश्राम अभ्यंकर यांच्या मार्गदर्शनाखाली सायबर गुन्हे पथकाचे उपनिरीक्षक राजाभाऊ गरड, सूरज जरग, रामपुरे यांचे पथक त्वरित कामाला लागले. पोलिसांनी तांत्रिक माहितीच्या आधारे आरोपींचा शोध सुरू केला. ही फसवणूक झारखंड राज्यातून केली जात असल्याचे समजताच पोलिसांचे पथक त्या ठिकाणी पोहोचले. रांचीमधील दलादिली चौकातील एका घरामध्ये पोलिसांनी छापा टाकला असता सचिन कुमार भरत मंडल आणि संजीत कुमार सीताराम मंडल हे दोघे अनेक सिमकार्डचा वापर करून फसवणूक करत असल्याचे आढळले. पोलिसांनी या दोघांना अटक करून फसवणूक करण्यासाठी वापरण्यात येणारी अनेक सिमकार्ड जप्त केली. हे लक्षात असू द्या - मोबाइलवर वीजबिलासाठी आलेल्या संदेशाला प्रतिसाद देऊ नये - वीजबिल थकीत आहे का, याची शहानिशा करावी - संदेशातील लिंकवर जाऊन ॲप डाउनलोड करणे टाळावे - ॲनी डेस्क, क्विक सपोर्ट, टीम व्ह्यूअर ॲप डाउनलोड करून मोबाइलचा ताबा अन्य कुणास देऊ नये - वीजबिलाबाबत कंपनीची अधिकृत वेबसाइट, अथवा बिलावरील क्रमांकावर चौकशी करावी - कंपनीच्या जवळील कार्यालय, अथवा बिल भरणा केंद्रात जाऊनही खातरजमा करता येते - ऑनलाइन व्यवहार करताना एखाद्या परिचयातील माहितगाराची मदत घ्यावी
