नवी दिल्ली: संपूर्ण देशभरात खळबळ माजवणाऱ्या हत्याप्रकरणाच्या तपासात दररोज नवनवीन चक्रावून टाकणारी माहिती समोर येताना दिसत आहे. गेल्या काही दिवसांपासून दिल्ली पोलिसांकडून आफताबची कसून चौकशी सुरु आहे. त्याची पॉलिग्राफ टेस्टही करण्यात आली आहे. श्रद्धाची हत्या केल्यानंतर एका मानसोपचार तज्ज्ञ असलेल्या तरुणीला डेट केल्याची माहिती आफताबाने पोलिसांना दिली होती. त्यानुसार दिल्ली पोलिसांनी संबंधित तरुणीला चौकशीसाठी समन्स पाठवले होते. आफताबने दिलेल्या माहितीनुसार, तो आणि संबंधित तरुणी जून-जुलै महिन्यात बम्बल या डेटिंग अॅपवर भेटले होते. त्यानंतर ही तरुणी छत्तरपूर येथील फ्लॅटवर आफताबला भेटायला आली होती. त्यावेळी आफताबने श्रद्धाची हत्या करुन काही दिवस उलटले होते. तरीही आफताब या तरुणीला बिनधास्त फ्लॅटवर घेऊन आल्याचे पोलीस तपासात समोर आले आहे. आफताबने मानसोपचार तज्ज्ञ असलेल्या या तरुणीला जाणीवपूर्वक डेट केले होते का, असा प्रश्नही आता उपस्थित झाला आहे. आतापर्यंतच्या तपासात श्रद्धा वालकरच्या हत्येनंतर आफताबने अत्यंत नियोजनपूर्व गोष्टी पार पाडल्याचे दिसून आले आहे. भविष्यात आपल्याला अटक होऊ शकते. पोलीस तपासावेळी आपली नार्को टेस्ट किंवा पॉलिग्राफ चाचणी होऊ शकते, याचा अंदाज आफताबला होता का? त्यादृष्टीने काही माहिती जाणून घेण्यासाठी आफताबने मानसोपचार तज्ज्ञ असलेल्या या तरुणीला डेट केले होते का, अशी शंका आता उपस्थित केली जात आहे. पोलिसांनी संबंधित मानसोपचार तज्ज्ञ तरुणीची चौकशी केली. यावेळी तिला आणि त्यांच्या नात्याविषयी प्रश्न विचारण्यात आले. यावेळी तरुणीने सांगितले की, टेलिव्हिजनवर आफताबने श्रद्धाची हत्या केल्याची बातमी ऐकून मला मोठा धक्का बसला. आफताबने श्रद्धाची हत्या केल्याची मला कोणतीही कल्पना नव्हती. आम्ही बम्बल या डेटिंग अॅपवर बोलायला सुरुवात केली आणि त्यानंतर एकमेकांना भेटलो. ऑक्टोबर महिन्यात मी आफताबच्या घरी गेले होते. त्यावेळी आफताबने मला परफ्युमची बाटली आणि काही भेटवस्तू दिल्या होत्या. त्यावेळी मी काहीवेळ आफताबच्या घरी थांबले होते. परंतु, मला काहीही संशयास्पद आढळले नाही, असे या तरुणीने सांगितले. ही तरुणी दोनवेळा आफताबच्या घरी आली होती. त्यानंतर ती आपल्या कामासाठी दिल्लीला निघून गेल्याचे आतापर्यंतच्या चौकशीत समोर आले आहे.
