नांदेड / छत्रपती संभाजीनगर : नांदेड येथील डॉ. शंकरराव चव्हाण शासकीय रुग्णालयातील रुग्णांच्या मृत्यूप्रकरणी चौकशी समितीने डॉक्टर निर्दोष असल्याचे म्हटले आहे. समितीने राज्य सरकारला अहवाल सादर केला आहे.डॉ. मीनाक्षी भट्टाचार्य, डॉ. प्रणिता जोशी, डॉ. भारत चव्हाण यांनी संपूर्ण परिस्थितीचा आढावा घेऊन डॉक्टर दोषी नसल्याचे स्पष्ट केले आहे, अशी माहिती सूत्रांनी दिली. डॉ. दिलीप म्हैसेकर यांच्या नेतृत्वाखालील दुसऱ्या समितीनेही अहवाल राज्य व केंद्र सरकारला पाठविला आहे. त्यातही डॉक्टरांना ‘क्लीन चिट’ दिल्याचे समजते. छत्रपती संभाजीनगरमधील ‘घाटी’तील समितीनेही अहवाल दिला आहे. शासकीय वैद्यकीय महाविद्यालय व रुग्णालयामध्ये मृत झालेले सर्वच रुग्ण अतिगंभीर होते आणि बहुतांश मृत संदर्भित रुग्ण होते. गणेशोत्सव व महालक्ष्मी सणामुळे खासगी रुग्णालयांतून नांदेडच्या शासकीय रुग्णालयामध्ये त्या काळात जास्त रुग्ण दाखल झाले होते, हेही घाटीच्या तीन सदस्य असलेल्या डॉक्टरांच्या समितीच्या अहवालात समोर आल्याचे समजते. महत्त्वाचे म्हणजे नवजात शिशूंसाठी असलेल्या एका वॉर्मरवर दोन-दोन, तीन-तीन नवजात शिशूंवर उपचार सुरू होते आणि नांदेड येथील रुग्णालयात ७५ नवजात शिशूंसाठी केवळ दोन परिचारिका उपलब्ध होत्या, याकडेही अहवालात लक्ष वेधण्यात आले आहे. मात्र, सर्व मृत रुग्णांना सर्व आवश्यक औषधे मिळाली होती, असेही अहवालात नमूद करण्यात आले आहे.दरम्यान, परिचारिकांची कमतरता, तसेच एका वॉर्मरवर दोन-तीन नवजात शिशूंवर उपचार होणे, ही परिस्थिती कमी-अधिक प्रमाणात राज्यातील बहुतांश शासकीय रुग्णालयांमध्ये असली, तरी संसर्ग टाळण्यासाठी हे चित्र बदलण्याची गरज आहे, याकडेही यानिमित्ताने लक्ष वेधले जात आहे. शासकीय रुग्णालयामध्ये तीन दिवसांपूर्वी २४ तासांमध्ये २४ रुग्णांचा मृत्यू झाला होता. त्यानंतर राज्यभरात खळबळ उडाली. दरम्यान, रुग्णालयात गेल्या २४ तासांमध्ये १४ जणांचा मृत्यू झाला. त्यामध्ये चार बालकांचा समावेश आहे. या काळात रुग्णालयातून १२४ रुग्णांना उपचारांनंतर घरी सोडण्यात आले, तर ३८ रुग्णांवर मोठ्या शस्त्रक्रिया झाल्या. दिवसभरात १७० नवे रुग्ण दाखल झाले असून, सध्या ११०३ रुग्णांवर उपचार सुरू आहेत.स्थानिक पातळीवर औषध खरेदीसार्वजनिक आरोग्य विभाग, वैद्यकीय शिक्षण व औषध विभागाला औषधखरेदीची परवानगी स्थानिक पातळीवर देण्यात आली आहे. नियोजन समितीने याबाबत निधी उपलब्ध करून द्यावा, असे राज्य सरकारने स्पष्ट केले. यामुळे औषधाचा साठा उपलब्ध होण्यास मदत होणार आहे. दरम्यान, नांदेडच्या रुग्णालयात औषधांचा तुटवडा असेल, तर गुरुद्वारा मंडळ त्यासाठी मदत करण्यासाठी तयार असल्याचे संचालक मंडळाने स्पष्ट केले. नांदेडमध्ये डॉक्टरांविरुद्धच गुन्हाशासकीय रुग्णालयातील रुग्णांच्या मृत्यूप्रकरणी अधिष्ठाता डॉ. श्याम वाकोडे आणि अन्य तीन डॉक्टरांविरोधात मृत्यूस कारणीभूत ठरल्याप्रकरणी गुन्हा दाखल करण्यात आला आहे. मृत विवाहितेच्या पतीने दिलेल्या तक्रारीवरून सिडको पोलिस ठाण्यामध्ये हा गुन्हा दाखल करण्यात आला आहे. दुर्घटनेमध्ये कंधार तालुक्यातील कामाजी टोपे यांची पत्नी आणि बाळाचा रुग्णालयात उपचार सुरू असताना मृत्यू झाला. त्यानंतर टोपे यांनी पोलिसांमध्ये तक्रार दाखल केली आणि हा गुन्हा दाखल करण्यात आला.
