परळी (बीड): 'परळीमध्ये मायबाप जनतेनं न्याय दिलाय. त्या न्यायाचा अर्थ मीडियानं काढावं. अधिकृत निकाल घोषित झाल्यानंतरच मी याबद्दल बोलेन,' अशी सूचक प्रतिक्रिया राष्ट्रवादी काँग्रेसचे नेते व परळी विधानसभा मतदारसंघाचे उमेदवार यांनी दिली आहे. परळीमध्ये धनंजय मुंडे यांची लढत त्यांची चुलत बहीण व राज्याच्या महिला-बालकल्याण मंत्री यांच्याशी झाली. भाजप आणि राष्ट्रवादी दोन्ही पक्षांनी ही निवडणूक प्रतिष्ठेची केली होती. पंतप्रधान नरेंद्र मोदी आणि भाजपचे राष्ट्रीय अध्यक्ष अमित शहा यांनी स्वत: पंकजा यांच्या प्रचारासाठी जंगी सभा घेतल्या होत्या. अखेरच्या टप्प्यात हा प्रचार वैयक्तिक पातळीवर गेला होता. त्यामुळं ही निवडणूक प्रचंड गाजली होती. 'परळीच्या जनतेनं ठरवलंय' अशी सूचक प्रतिक्रिया धनंजय मुंडे यांनी मतदानाच्या दिवशी दिली होती. आतापर्यंत हाती आलेल्या निकालानुसार, धनंजय मुंडे यांनी २१ हजारांहून अधिक मतांची आघाडी घेतली आहे. त्यामुळं परळीत यावेळी वेगळा निकाल लागणार हे जवळपास निश्चित झालं आहे. त्या पार्श्वभूमीवर वृत्तवाहिन्यांनी धनंजय यांची प्रतिक्रिया विचारली असता त्यांनी तूर्त फार काही बोलण्यास नकार दिला. 'मायबाप जनतेनं जो न्याय दिलाय, त्याचा अर्थ तूर्त माध्यमांनी काढावा. भावनिक राजकारण कुणी केलं आणि विकासावर कोण बोललं, हे सगळ्यांच्या लक्षात आलेलं आहे. सविस्तर प्रतिक्रिया मी अधिकृत निकालानंतर देईन,' असं धनंजय मुंडे म्हणाले.
