मुंबई: सदोष वैद्यकीय यंत्रणेमुळे केईएम रुग्णालयामध्ये भाजलेल्या व त्यामुळे डावा हात गमावलेल्या उत्तर प्रदेशमधील राजभर या चार महिन्यांच्या बाळाचा गुरुवारी मध्यरात्री पावणेतीनच्या सुमारास मृत्यू झाला. त्याची प्रकृती गुरुवारी खूप खालावली होती. त्याचा रक्तदाब खूप खाली गेला होता. रात्री २.३० वाजता त्याला हृदयविकाराचा झटका आला आणि त्यात तो दगावला. गेले दोन आठवडे प्रिन्सचा सुरु असलेला जगण्याचा संघर्ष यामुळे थांबला. उत्तर प्रदेशातून प्रिन्सला हृदयावरील उपचारांसाठी त्याच्या पालकांनी केईएम रुग्णालयामध्ये आणले होते. प्रिन्सला ऑक्सिजनची पातळी अधिक असलेल्या क्षमतेच्या व्हेण्टिलेटरवर त्याला ठेवण्यात आले होते. त्याची प्रकृती गुरुवारी आणखी खालावली होती. त्याचा रक्तदाब अधिक खाली गेला होता, तो वेगवेगळ्या प्रकारच्या हृदयदोष नियंत्रण करणाऱ्या तीन औषधांनी स्थिर करण्याचा प्रयत्न केला जात असल्याची माहिती केईएम रुग्णालयाचे अधिष्ठाता डॉ. हेमंत देशमुख यांनी गुरुवारी सायंकाळी दिली होती. मात्र रात्री हृदयविकाराच्या धक्क्याने प्रिन्सची प्राणज्योत मालवली. या प्रकरणाचा अभ्यास करण्यासाठी पालिकेने चौकशी समितीही नेमली आहे. समितीचा वैद्यकीय अहवाल अद्याप आलेला नाही. या तपासामध्ये लागणारी सगळी वैद्यकीय उपकरणेही पोलिसांनी न्यायवैद्यक प्रयोगशाळेकडे पाठवली आहेत. त्यांचाही अहवाल अद्याप आलेला नाही, असे पालिका रुग्णालयाचे संचालक डॉ. रमेश भारमल यांनी महाराष्ट्र टाइम्सच्या प्रतिनिधींना सांगितले. नेमकं काय घडलं होतं? चार महिन्याच्या प्रिन्सला हृदयविकारावरील वैद्यकीय उपचारांसाठी परळ मधील केईएम रुग्णालयाच्या बालरोग विभागाच्या अतिदक्षता विभागात दाखल करण्यात आले होते. तेथे उपचारांदरम्यान ईसीजी यंत्रणेमध्ये बिघाड झाल्याने प्रिन्स होरपळला होता. ६ नोव्हेंबरच्या मध्यरात्री हा अपघात घडला. हृदयाच्या ठोक्यांवर देखरेख करण्यासाठी प्रिन्सला ईसीजी यंत्र लावले होते. या यंत्रामध्ये काही तांत्रिक बिघाड झाल्याने तारांनी पेट घेतला. त्यामुळे प्रिन्सच्या खाटेवरील चादरीलाही आग लागली. यामध्ये त्याच्या खांदा, कान आणि कमरेचा भाग भाजला. आग आटोक्यात आणून त्याच्यावर उपचार सुरू केले गेले होते. भाजल्यामुळे त्याच्या रक्ताभिसरण प्रक्रियेमध्ये अडथळा येत होता, त्यामुळे त्याचा हातही कापावा लागला होता.
