नवी दिल्लीः झारखंड मुक्ती मोर्चाचे नेते आज झारखंडच्या मुख्यमंत्रिपदाची शपथ घेणार आहेत. आज दुपारी २ वाजता रांचीतील मोरहाबादी मैदानावर हा शपथविधी सोहळा पार पडणार असून या शपथविधी सोहळ्याला देशभरातील दिग्गज नेते उपस्थित राहणार आहेत. सोरेन यांच्या शपथविधीचे निमित्त साधून भाजप विरोधी पक्ष आपले शक्तिप्रदर्शन करण्याची शक्यता आहे. या शपथविधीला उपस्थित राहण्यासाठी पश्चिम बंगालच्या मुख्यमंत्री ममता बॅनर्जी या शनिवारीच रांचीत पोहोचल्या आहेत. आज दुपारी २ वाजेच्या सुमारास होणाऱ्या शपथविधी सोहळ्याला माजी राष्ट्रपती प्रणव मुखर्जी हे खास उपस्थित राहणार आहेत. विधानसभा निवडणूक निकालानंतर विरोधी पक्ष नेते असलेले हेमंत सोरेन यांनी आपले समविचारी पक्ष काँग्रेस आणि राष्ट्रीय जनता दल (आरजेडी) च्या नेत्यांसोबत तसेच ५० आमदारांचे स्वाक्षरी असलेले पत्र घेऊन राज्यपालांची भेट घेतली होती. तसेच सत्ता स्थापनेचा दावा केला होता. महाराष्ट्रासारखं राज्य भाजपच्या हातातून गेल्यानंतर झारखंड हे राज्यही भाजपच्या हातातून आता गेले आहे. गेल्या दीड वर्षात झालेल्या निवडणुकीत भाजपला फारसं यश मिळालं नाही. त्यामुळे भाजप विरोधकांना आता आयतीच संधी मिळाली आहे. देशभरात भाजपविरोधी वातावरण तयार करण्यासाठी विरोधक एकवटल्याचे दिसत असून या शपथविधी सोहळ्यानिमित्त विरोधक आपले शक्तिप्रदर्शन करतील, असे दिसते आहे. सोरेन यांच्या शपथविधी सोहळ्यात काँग्रेसचे माजी राष्ट्रीय अध्यक्ष राहुल गांधी, दिल्लीचे मुख्यमंत्री अरविंद केजरीवाल, सपाचे राष्ट्रीय अध्यक्ष अखिलेश यादव, बसपाच्या राष्ट्रीय अध्यक्षा मायावती, राष्ट्रवादीचे नेते शरद पवार, डीएमकेचे अध्यक्ष स्टॅलिन, शिवसेनेचे पक्षप्रमुख तसेच महाराष्ट्राचे मुख्यमंत्री उद्धव ठाकरे, मध्य प्रदेशचे मुख्यमंत्री कमलनाथ, राजस्थानचे मुख्यमंत्री अशोक गहलोत, छत्तीसगडचे मुख्यमंत्री भूपेश बघेल हे नेते उपस्थित राहण्याची शक्यता आहे. झारखंडचे काळजीवाहू मुख्यमंत्री रघुबर दास हे आजच्या शपथविधी सोहळ्याला उपस्थित राहणार आहेत. हेमंत सोरेन यांनी दास यांना दूरध्वनी करून या शपथविधी सोहळ्याचे निमंत्रण दिले आहे.
