नवी दिल्ली : प्रामाणिक करदात्यांसाठी (Honest Taxpayer) पंतप्रधान () थोड्याच वेळात विशेष मंचांची घोषणा करणार आहेत. या योजनेविषयीचे सूतोवाच केंद्रीय अर्थसंकल्पात करण्यात आले होते. त्यावेळी करदात्यांची सनद ही कल्पना मांडण्यात आली होती. यासंदर्भात केंद्रीय अर्थ मंत्रालयाने प्रसिद्ध केलेल्या निवेदनात म्हटले आहे की, 'ट्रान्सपरन्ट टॅक्सेशन ऑनरिंग दि ऑनेस्ट' () हे या मंचाचे नाव असून याद्वारे पंतप्रधान करसुधारणा पुढे नेतील. करोनाचे संकट आणि यातून अर्थव्यवस्थेला बसलेला फटका यामुळे सरकारचे कर संकलन मोठ्या प्रमाणात कमी झाले आहे. त्यामळे सरकारने आता करदात्यांना प्रोत्साहन देण्याचा विचार सुरु केला आहे. आज सकाळी ११ वाजता पंतप्रधान नरेंद्र मोदी देशाला संबोधित करणार आहेत. त्यात ते 'ट्रान्सपरन्ट टॅक्सेशन ऑनरिंग दि ऑनेस्ट' हे या मंचाचे उदघाटन करतील. करदात्यांच्या प्रामाणिकपणाची कशा प्रकारे दखल घ्यावी, यासाठी गेले महिनाभर आयकर आणि अर्थ मंत्रालयातील वरिष्ठ अधिकाऱ्यांच्या बैठक सुरु होत्या. यात कर प्रणाली पारदर्शक आणि जलद असावी असे एकमत झाले आहे. त्याचबरोबर प्रामाणिक करदात्यांना कर सवलत देण्याबाबत देखील चर्चा झाल्याचे सूत्रांनी म्हटलं आहे. विशेषत: जे अतिश्रीमंत किंवा धनाढ्य करदाते आहेत त्यांना खूश करण्याचे केंद्र सरकारने उद्धिष्ट आहे, असे सूत्रांनी म्हटलं आहे. केंद्रीय प्रत्यक्ष कर मंडळातर्फे गेल्यावर्षी कॉर्पोरेट कर ३० टक्क्यांवरून २२ टक्क्यांवर आणण्यात आला. नव्या उद्योगांसाठी हा कर १५ टक्के करण्यात आला आहे. लाभांश वितरण करही काढून टाकण्यात आला आहे. करदात्यांशिवाय सरकारकडून कर प्रणालीतील सुधारणांची घोषणा केली जाऊ शकते. याशिवाय नवउद्यमींसाठी कर सवलत जाहीर होण्याची शक्यता जाणकारांनी व्यक्त केली आहे. या घोषणा होण्याची शक्यता - करदात्यांसाठी आयकर प्रणाली सुटसुटीत आणि जलद बनवली जाईल. - नवउद्यमी अर्थात स्टार्टअपसाठी आज कर सवलती जाहीर होऊ शकतात. - कर परतावा प्रक्रिया आणखी वेगवान करण्याची उपाययोजना. - प्रामाणिक करदात्यांसाठी खास घोषणा केली जाईल.
