म. टा. प्रतिनिधी, गुन्ह्यात अडकलेल्या भावाला मदत करण्याचा बहाण्याने पोलिस हवालदाराने तरुणीचा विनयभंग केल्याचा प्रकार समोर आला आहे. या प्रकरणी २७ वर्षीय तरुणीने दिलेल्या तक्रारीवरून, या हवालदाराच्या विरोधात बंडगार्डन पोलिस ठाण्यात विनयभंगाचा गुन्हा दाखल करण्यात आला. ताकमोडे हा पोलिस मुख्यालयात नेमणुकीला आहे. पोलिसांनी दिलेल्या माहितीनुसार, पीडित तरुणीच्या भावावर स्वारगेट पोलिस ठाण्यात गुन्हा दाखल असून, त्याला पोलिसांनी अटक केली होती. तरुणीच्या भावाला बंडगार्डन लॉकअपमध्ये ठेवण्यात आले होते. त्या वेळी आरोपी ताकमोडेने मदत करण्याच्या बहाण्याने तरुणीसोबत ओळख करून घेतली. त्यानंतर तरुणीला सतत फोन करत होता. ताकमोडेने २४ डिसेंबर २०२० रोजी तरुणीला लग्नासाठी स्थळ दाखविण्याच्या बहाण्याने पुणे स्टेशन परिसरातील एका लॉजवर नेले, तसेच तेथे तिच्याशी अश्लील वर्तन केले. या प्रकारामुळे तरुणी घाबरली होती. त्यानंतर तिने पोलिसांकडे जाऊन तक्रार दिली. येरवड्यात महिलेचा विनयभंग पुणे : येरवड्यातील लक्ष्मीनगरमध्ये महिलेचा पाठलाग करून भर रस्त्यात विनयभंग केल्याचा प्रकार समोर आला आहे. या प्रकरणी ३६ वर्षीय महिलेने दिलेल्या तक्रारीवरून हबीब बाबू शेख (वय ४८) याच्या विरोधात येरवडा पोलिस ठाण्यात गुन्हा दाखल करण्यात आला. शेख हा एका वर्षापासून पीडित महिलेला त्रास देत होता. १२ फेब्रुवारीला त्याने महिलेचा पाठलाग केला. महिलेला शिवीगाळ करून, धमकी दिली. या सर्व प्रकारानंतर महिलेने पोलिस ठाण्यात जाऊन तक्रार दिली. या प्रकरणी येरवडा पोलिस तपास करीत आहेत.
