: रिक्षातून उतरून घराकडे पायी चाललेल्या वृद्धेच्या गळ्यातील सोन्याची पोत हिसकावून मोटारसायकलस्वारांनी पोबारा केला. हिरावाडी परिसरात गुरुवारी हा प्रकार घडला असून, पोलिसांनी जबरी चोरीचा गुन्हा दाखल केला आहे. शोभा जयराम रणधीर (वय ६५, रा. साई रेसिडेन्सी, तांबोळीनगर) यांनी फिर्याद दिली. त्या घराकडे पायी चालल्या असताना जोशी कॉलनी कमानीजवळ समोरून दोघेजण आले. मोटारसायकलवरील एकाने त्यांच्या गळ्यातील ८० हजार रुपये किमतीची सोन्याची पोत हिसकावली. दोन लाखांचा गंडा नाशिक : सोशल मीडियावर वाहनविक्रीची जाहिरात टाकून भामट्यांनी एका तरुणाला दोन लाख रूपयांना गंडविले. ऑनलाइन पैसे भरण्यास भाग पाडून ही फसवणूक करण्यात आली. या प्रकरणी सायबर पोलिस स्टेशनमध्ये फसवणूक आणि आयटीअ‍ॅक्टनुसार गुन्हा दाखल करण्यात आला आहे. ओमप्रकाश पुनमाराम बिश्नोई (रा. शाम अपार्टमेंट, हनुमाननगर) यांनी फिर्याद दिली. बिश्नोई यास वाहन खरेदी करायची होती. त्यामुळे तो फेसबुकच्या माध्यमातून चांगल्या वाहनाच्या शोधात होता. फेसबुक पेजवरील इनोव्हा कार पसंतीस पडल्याने त्याने १२ जानेवारी रोजी भामट्यांशी संपर्क साधला होता. या वेळी संशयितांनी त्याला वेगवेगळी कारणे सांगून बनावट बँक खात्यामध्ये पैसे भरण्यास भाग पाडले. त्यांनी २ लाख १ हजार २५० रुपयांचा भरणा केला होता. पेटवून घेऊन आत्महत्या नाशिक : मद्याच्या नशेत असणाऱ्या एकाने पेटवून घेत आत्महत्या केली. महामार्गावरील स्वामी समर्थनगर परिसरात हा प्रकार घडला. याप्रकरणी आडगाव पोलिसांनी मृत्युची नोंद केली आहे. महेश अरुण बाविस्कर (वय ४०) असे आत्महत्या करणाऱ्याचे नाव आहे. बाविस्कर याला दारूचे व्यसन होते. गुरुवारी (दि. ४) सकाळी त्याने राहत्या घरात स्वत:ला पेटवून घेतले. कुटुंबीयांनी त्याला तत्काळ सिव्हिल हॉस्पिटलमध्ये दाखल केले. परंतु, त्याचा मृत्यू झाला. बोरगड परिसरात एकाची आत्महत्या नाशिक: हातावर ब्लेडने वार करून घेत ५५ वर्षीय व्यक्तीने आत्महत्या केली. बोरगड परिसरात हा प्रकार घडला. म्हसरूळ पोलिसांनी मृत्यूची नोंद घेतली असून, आत्महत्येचे कारण समजू शकले नसल्याचे पोलिसांकडून सांगण्यात आले. अनिल बुधाजी अहिरे (वय ५५, रा. अंकाई सोसायटी, एकतानगर) असे आत्महत्या करणाऱ्या व्यक्तीचे नाव आहे. अहिरे यांनी रविवारी (दि. ३१) राहत्या घरात स्व:ताच्या हातावर ब्लेडने वार करून घेतले होते. मोठा रक्तश्राव झाल्याने त्यांना कुटूंबियांनी खासगी हॉस्पिटलमध्ये दाखल केले. तेथून सिव्हिल हॉस्पिटलमध्ये दाखल केले. परंतू त्यांचा मृत्यू झाला. बेकायदा मद्यविक्री प्रकरणी एकास अटक किराणा दुकानाच्या मागील बाजूस बेकायदा मद्यविक्री करणाऱ्याला पोलिसांनी अटक केली. संशयिताच्या ताब्यातून 'प्रिन्स संत्रा' या देशी दारूच्या सुमारे दोन हजार रुपये किमतीच्या बाटल्या हस्तगत करण्यात आल्या. या प्रकरणी अंबड पोलिसांनी दारूबंदी कायद्यान्वये गुन्हा दाखल केला आहे. गुन्हे शाखेच्या युनिट दोनने ही कारवाई केली. सूरज सुभाष चाफळकर (वय ३६, रा. अंबड) असे संशयिताचे नाव आहे. बेकायदा मद्याची विक्री होत असल्याची माहिती पोलिसांना मिळाली होती. त्यानुसार युनिट दोनच्या पथकाने गुरुवारी (दि. ४) तेथे छापा टाकला.
