म. टा. प्रतिनिधी, मुंबई दिवंगत अभिनेते राज कपूर यांचा नातू हा ईडीच्या रडारवर आला आहे. आमदार यांचे नाव आलेल्या टॉप सिक्युरिटी घोटाळ्यात त्याचा सहभाग असल्याचे समोर आले आहे. टॉप सिक्युरिटी या खासगी सुरक्षा रक्षक संस्थेला कंत्राट देताना गैरव्यवहार झाल्याचे समोर आले आहे. या कंपनीच्या संचालकांनी परदेशी रक्कमेचा घोटाळा केल्याने त्या सबंधितांची सक्तवसुली संचालनालयाकडून चौकशी सुरू आहे. त्या अंतर्गतच आमदार प्रताप सरनाईक व त्यांचे पुत्र विहंग यांचीही ईडीने चौकशी केली आहे. अरमान जैन व विहंग यांचे एकमेकांशी संबंध असल्याचा ईडीचा संशय आहे. ईडीतील सूत्रांनी दिलेल्या माहितीनुसार, अरमान जैन व विहंग सरनाईक हे मित्र आहेत. या दोघांचे व्हाट्सअप चॅट ईडीला मिळाले आहे. त्या चॅटमध्ये दोघेही आर्थिक देवाणघेवाणीबाबत बोलत असल्याचे दिसून येत आहे. त्याआधारे ईडीने अरमानच्या घरी छापा टाकला होता. त्यात काही महत्त्वाची कागदपत्रे मिळाली. त्यामुळेच आता त्याला चौकशीसाठी बोलवले आहे. अरमान हा राज कपूर यांच्या मुलीचा मुलगा आहे. तो बॉलिवूड सेलिब्रिटी रणबीर कपूरचा आत्येभाऊ आहे. त्यामुळेच त्याला चौकशीसाठी समन्स बजावल्याची जोरदार चर्चा सुरू आहे. सिनेमासाठी काळा पैसा? अरमान जैनने काही चित्रपटांत भूमिका केल्या आहेत, तर विहंग सरनाईक हेदेखील चित्रपटनिर्मितीत आहेत. यामुळे चित्रपटनिर्मितीशी संबंधित हे दोघे एकमेकांच्या संपर्कात असून, त्यात काळ्या पैशांचा उपयोग झाला का, याचाही तपास करीत आहे.
