लंडन: करोनाच्या संसर्गाने जवळपास दीड वर्ष संपूर्ण जगात थैमान घातले आहे. करोनाचा विषाणू स्वरूप बदलत असल्याने चिंता व्यक्त करण्यात येत आहे. करोनाचा नवा वेरिएंट आणखी घातक ठरण्याची भीती ब्रिटनच्या संशोधकांनी व्यक्त केली आहे. या नव्या वेरिएंटमुळे मृत्यू दरात वाढ होण्याचा इशारा देण्यात आला आहे. ब्रिटन सरकारच्या सायंटिफीक एडव्हायजरी ग्रुप फॉर एमर्जेंसीजच्या (SAGE) एका अहवालात हा इशारा देण्यात आला आहे. नव्या वेरिएंटमुळे मृत्यू दराचे प्रमाण ३५ टक्के होण्याची भीती व्यक्त करण्यात आली आहे. वैज्ञानिकांच्या समितीत असलेल्या तज्ज्ञांनी सांगितले की, विषाणू दीर्घकाळ राहिल्यास त्याच्यात म्यूटेशनची अधिक शक्यता असते. ब्रिटनमध्येही असेच होत आहे. ब्रिटनमध्ये हिवाळा सुरू होण्याआधी बुस्टर डोस द्यावे लागतील. त्याशिवाय, परदेशातून येणारे नवीन वेरिएंट रोखणे आणि विषाणू जिवंत ठेवणाऱ्या काही प्राण्यांना मारावे लागू शकते, असेही त्यांनी म्हटले. वाचा: करोनाच्या संसर्गामुळे येत्या काही शक्यतांबाबत एक संशोधन लेख प्रसिद्ध करण्यात आला आहे. यामध्ये सुपर-म्युटेंट वेरिएंटचा धोका असल्याचे सांगण्यात आले. तज्ज्ञांनी सांगितले की, करोनाचा स्ट्रेन हा बीटा, अल्फा अथवा डेल्टा वेरिएंटसोबत मिळाला तर लशीला निष्प्रभ करू शकतो. त्यामुळेच मृत्यूदर वाढण्याची भीती व्यक्त केली जात आहे. लशीला निष्प्रभ करण्यासाठी एखाद्या शक्तीशाली स्ट्रेनची आवश्यकता असल्याचे तज्ज्ञांनी म्हटले. करोना विषाणूने अद्यापही आपली पाठ सोडली नसल्याचा इशारा वैज्ञानिकांनी सरकारला दिला आहे. करोना निर्बंध संपुष्टात आणत असताना सरकारने अधिक सतर्क होण्याची आवश्यकता आहे. काही औषधांचा वापर जपून करण्याची सूचना तज्ज्ञांनी केली आहे.
