म. टा. विशेष प्रतिनिधी, नाशिक जिल्ह्यातील मालेगावमध्ये २००८मध्ये झालेल्या बॉम्बस्फोट घटनेच्या खटल्यात आणखी एक महत्त्वाचा साक्षीदार उलटला आहे. या साक्षीदाराने या प्रकरणातील आरोपी लेफ्टनंट कर्नल प्रसाद पुरोहितविरोधात पूर्वी या प्रकरणाचा तपास करणाऱ्या महाराष्ट्र एटीएसला दिलेल्या जबाबात महत्त्वाची माहिती दिली होती. विशेष एनआयए न्यायालयात याप्रकरणी सुरू असलेल्या खटल्यात आत्तापर्यंत १८८ साक्षीदारांच्या साक्षी नोंदवण्यात आल्या आहेत आणि साक्षीबाबत आत्तापर्यंत उलटलेला हा दुसरा साक्षीदार आहे, अशी माहिती विशेष सरकारी वकील अविनाश रसाळ यांनी दिली. यापूर्वी पंचनाम्यावेळी पंच म्हणून राहिलेला एक साक्षीदार उलटला होता. या बॉम्बस्फोट प्रकरणाचा तपास पूर्वी महाराष्ट्र एटीएसने केला होता आणि नंतर तो राष्ट्रीय तपास संस्थेकडे (एनआयए) वर्ग झाला. शनिवारच्या सुनावणीदरम्यान उलटलेल्या साक्षीदाराने एटीएसकडे आपला जबाब नोंदवताना सातारा जिल्ह्यातील पांचगणी येथे झालेल्या एका साहस शिबिराविषयी माहिती दिली होती. 'मला पूर्वी लष्करात जायचे होते आणि म्हणून साहस शिबिरात भाग घेतला होता. मात्र, ते केवळ म्हणायला साहस शिबीर होते. त्या शिबिरात भारतात फोफावणारा दहशतवाद आणि बनावट नोटा व अंमली पदार्थांच्या माध्यमातून भारताला कमजोर करण्यासाठी पाकिस्तानचे सुरू असलेले प्रयत्न, याविषयी चर्चासत्र झाले. त्यात प्रसाद पुरोहित यांनी एक व्याख्यान दिले होते', असे साक्षीदाराने जबाबात म्हटले होते. मात्र, शनिवारी न्यायालयात झालेल्या साक्षीच्या वेळी यासंदर्भात विचारलेल्या बहुतांश प्रश्नांना त्याने 'माहीत नाही', असे उत्तर दिले आणि एटीएसकडे कोणताही जबाब नोंदवला नसल्याचा दावाही केला. त्यानंतर विशेष एनआयए न्यायालयाचे न्यायाधीश पी. आर. सित्रे यांनी त्याला उलटलेला साक्षीदार म्हणून घोषित केले. या मालेगाव खटल्यात भाजपच्या भोपाळमधील खासदार प्रज्ञासिंह ठाकूर, निवृत्त मेजर रमेश उपाध्याय, अजय राहिरकर, सुधाकर द्विवेदी, सुधाकर चतुर्वेदी व समीर कुलकर्णी हे आरोपी आहेत. सध्या हे सर्व आरोपी जामिनावर असून त्यांच्याविरोधात बेकायदा कारवाया प्रतिबंधक कायदा (यूएपीए) व भारतीय दंड संहितेच्या विविध कलमांखालील आरोपांविषयी खटला सुरू आहे.
