म. टा. विशेष प्रतिनिधी, शिवसेनेने भाजपला धोबीपछाड देत राज्यातील सत्ता हिसकावून घेतल्याने वर्मी घाव लागलेल्या भाजपने आता सेनेला धक्का देण्यासाठी मुंबई महापालिकेवर लक्ष केंद्रित केले आहे. पक्षाचे राष्ट्रीय अध्यक्ष यांनी पालिका निवडणुकीत एकीकडे शिवसेनेला धूळ चारण्याचा इरादा व्यक्त केला आहे. तर या निवडणुकीत किमान १०० जागा जिंकून आणत मुंबई महापालिकेत वर्षानुवर्षे चालत आलेल्या शिवसेनेच्या सत्तेला चाप लावण्यासाठी भाजपने कंबर कसली आहे. आसाममधील आमदारांच्या मार्गदर्शन शिबिराच्या निमित्ताने जे. पी. नड्डा हे दोन दिवस मुंबई दौऱ्यावर होते. यात त्यांनी आगामी निवडणुकीसंदर्भात पक्षाच्या तयारीचा आढावा घेताना या निवडणुकीत भाजपची सत्ता येईल आणि नंतर राज्यातही भाजप सत्तेवर येईल, असे स्पष्ट केले. 'भाजप येणार, मुंबई घडवणार', असा नारा यावेळी देण्यात आला. नड्डा यांनी शिवसेनेला धूळ चारण्याचा इरादा भाजप पदाधिकाऱ्यांच्या बैठकीत बोलावून दाखवला. तत्पूर्वीच राज्यातील भाजपकडून गेल्या काही महिन्यांपासूनच शिवसेनेला मुंबई महापालिका निवडणुकीत चारीमुंड्या चीत करण्यासाठीची रणनीती आखली जात आहे. मागील महापालिका निवडणुकांमध्ये राज्यात शिवसेना-भाजप यांच्यात युती असली तरी मुंबई महापालिकेत मात्र या दोन्ही पक्षांनी एकमेकांविरोधात शड्डू ठोकला होता. अतितटीच्या मुकाबल्यात शिवसेनेला ८४, तर भाजपला फक्त दोन कमी म्हणजेच ८२ जागा मिळाल्या होत्या. भाजपला मुंबई महापालिकेपेक्षा राज्यातील सत्तेत रस असल्याने भाजपच्या नेतृत्वाने पालिकेत शिवसेनेला सत्ता स्थापण्यासाठी आठकाठी केली नव्हती. मात्र मधल्या काळात पुलाखालून बरेच पाणी वाहून गेले असून, आता भाजपने मुंबई महापालिकेच्या निमित्ताने शिवसेनेसोबत दोन हात करण्यचे निश्चित केले आहे. कोणत्याही परिस्थितीत किमान १०० जागा निवडून आणण्याचे उद्दिष्ठ भाजपने ठरविले आहे. त्यासाठी आवश्यक ती रणनीतीही आखली आहे. मुंबई महापालिकेतील भ्रष्टाचार हाच भाजपने प्रचाराचा मुख्य मुद्दा बनविण्याचे ठरवण्यात आले असून, त्यासाठी महापालिकेतील भ्रष्टाचाराची प्रकरणांची सखोल माहितीही घेऊन ठेवली आहे. 'महापालिकेवर भगवाच!' जे. पी. नड्डा यांच्या या वक्तव्याबाबत शिवसेनेकडून कोणतीही अधिकृत प्रतिक्रिया देण्यात आली नसली तरी पक्षाच्या एका ज्येष्ठ नेत्याने मात्र, भाजपने कितीही प्रचार वा अपप्रचार केला तरी मुंबई महापालिकेवरचा भगवा खाली उतरविण्यात त्यांना यश येणार नसल्याची प्रतिक्रिया नाव न सांगण्याच्या अटीवर दिली. करोनाकाळात आम्ही केलेले काम हेच आम्हाला तारणार असल्याचा विश्वासही या नेत्याने व्यक्त केला.
