मटा विशेष, मुंबई : राज्यसभा, विधान परिषद आणि राज्य सरकारमध्ये अनपेक्षित बदल घडवल्यानंतर भारतीय जनता पक्षाने आता मुंबई महानगर प्रदेशातील रेल्वे प्रवाशांना सुखद धक्का देण्याचे नियोजन केले आहे. मुंबई उपनगरीय रेल्वेचे संपूर्ण वातानुकूलित करण्याच्या २० हजार कोटींच्या प्रकल्पाला प्राधान्य देण्याचे आदेश पंतप्रधान कार्यालयाने दिले असून त्यासाठी लवकरच केंद्रीय अर्थखात्याची मंजुरी मिळण्याची शक्यता आहे. १२ दिवसांपासून सुरू असलेल्या पक्षीय राजकारणानंतर आता सुखकर प्रवास प्रकल्प अर्थात वातानुकूलित लोकल आणि रेल्वे मार्गाचे विस्तारीकरणावर लक्ष देण्यात येणार आहे. मुंबईसह ठाणे आणि अन्य महापालिका निवडणुका डोळ्यासमोर ठेवून भाजपने प्रकल्प लोकार्पणाचे नियोजन केले आहे. मुंबई महानगर प्रदेशात स्वस्त आणि जलद प्रवास केवळ लोकलने शक्य आहे. तिकीटदरांमध्ये निम्म्याने घट केल्यानंतर वातानुकूलित लोकलला चांगला प्रतिसाद मिळत आहे. तसेच या लोकलमुळे दरवाज्यामधून लटकून होणारे अपघात बंद झाले आहेत. यामुळे मुंबई रेल्वे विकास महामंडळाच्या मुंबई नागरी परिवहन प्रकल्पाच्या माध्यमातून २३८ वातानुकूलित लोकल खरेदी करण्यात येणार आहेत. याचा लाभ मुंबईसह एमएमआरमधील सर्वच महापालिकेतील मतदार असलेल्या प्रवाशांना होणार आहे. मुंबई उपनगरीय रेल्वे संपूर्ण वातानुकूलित करण्यासाठी निविदा कागदपत्रे तयार करण्यात आली आहेत. या प्रकल्पासाठी २० हजार कोटींहून अधिक खर्च अपेक्षित आहेत. प्रकल्प निविदेसाठी सर्व कागदपत्रे तयार आहेत. अर्थ खात्याकडून मंजुरीसाठी प्रस्ताव पाठवला आहे. मंजुरी मिळाल्यानंतर तातडीने निविदा मागवण्यात येतील, असे वरिष्ठ रेल्वे अधिकाऱ्यांनी सांगितले. उरणकडेही लक्ष उरण परिसर लोकलच्या टप्प्यात आणण्याच्यादृष्टीने खारकोपर-उरण लोकलमार्ग दोन महिन्यांत लोकार्पणासाठी तयार ठेवण्याच्या सूचनाही देण्यात आल्याचे समजते. बेलापूर-खारकोपर-उरण या मध्य रेल्वेवरील चौथ्या रेल्वेमार्गाचे काम ९० टक्के पूर्ण झाले आहे. सप्टेंबरअखेर हे काम पूर्ण करण्याचे नियोजन आहे. या प्रकल्पासाठी सिडकोकडून निधी मिळणे अपेक्षित असून भाजपचे सरकार आल्याने आता निधीचा अडथळा दूर होईल.
