म. टा. प्रतिनिधी, पुणे: ‘मला तुझ्याशी लग्न करायचे आहे. तू मला हो म्हण, नाही तर मी फाशी घेईन,’ अशी धमकी देणाऱ्या तरुणाला विनयभंग करून धमकी दिल्याप्रकरणी अटक करण्यात आली. ओंकार रवी शिंदे (वय २०, रा. विघ्नहर्ता हाइट्स, मानाजीनगर, वडगाव) असे अटक केलेल्याचे नाव आहे.पोलिसांनी दिलेल्या माहितीनुसार, या प्रकरणी एका १७ वर्षीय मुलीने सिंहगड रस्ता पोलिस ठाण्यात तक्रार दिली आहे. हा प्रकार फेब्रुवारी ते मार्च २०२४ या दरम्यान घडला आहे. आरोपीने अल्पवयीन मुलीचा वारंवार पाठलाग करून त्याचे तिच्यावर प्रेम असल्याचे सांगितले. लग्नासाठी होकार द्यायला आग्रह धरला होता. काही दिवसांपूर्वी आरोपीने मुलीवर दबाव टाकण्यासाठी आत्महत्या करण्याची धमकी दिली. त्यामुळे घाबरलेल्या मुलीने पोलिसांत तक्रार दिली. सिंहगड रस्ता पोलिस याचा तपास करीत आहेत.आंबेगाव बुद्रुक येथे महिलेकडे शरीरसुखाची मागणी करून विनयभंग करणाऱ्या एकावर गुन्हा दाखल करण्यात आला आहे. भारती विद्यापीठ पोलिस ठाण्यात प्रकाश कदम (रा. स्वरूप अपार्टमेंट, आंबेगाव बुद्रुक) याच्यावर गुन्हा दाखल करण्यात आला आहे. या प्रकरणी एका ३४ वर्षीय महिलेने तक्रार दिली. हा प्रकार सात व आठ मार्चला घडला.पोलिसांनी दिलेल्या माहितीनुसार, आरोपी आणि तक्रारदार महिला एकमेकांच्या ओळखीचे असून, ओळखीतून आरोपी महिलेशी जवळीक साधण्याचा प्रयत्न केला. आरोपीने महिलेला अश्लील भाषेत व्हॉट्सअ‍ॅपवर मेसेज करून शरीरसुखाची मागणी केली होती.
