मुंबई: कर्तव्यावर असताना करोनाची लागण होऊन प्राण गमवावे लागणाऱ्या पोलिसांच्या कुटुंबीयांना आता प्रत्येकी ६५ लाख रुपयांची भरपाई मिळणार आहे. राज्य सरकार मृत पोलिसांच्या कुटुंबीयांना ५० लाख रुपये भरपाई आणि घरातील एकाला नोकरी देणार आहे. तर फाऊंडेशनकडून १० लाख आणि खासगी बँकेकडून विमा संरक्षण म्हणून प्रत्येकी ५ लाख रुपये देण्यात येणार आहेत. मृत पोलिसांच्या कुटुंबीयांना देण्यात येणाऱ्या या भरपाईचा निर्णय पोलीस आयुक्त यांनी घेतल्याची माहिती पोलिसांचे प्रवक्ते आणि पोलीस उपायुक्त प्रणय अशोक यांनी दिली आहे. करोना व्हायरसमुळे मुंबईत आतापर्यंत ८ पोलिसांना आपला जीव गमवावा लागला आहे. तर ६०० पोलिसांना संसर्ग झाला आहे. उद्योजक, व्यावसायिक, सेलिब्रिटी आणि बॉलिवूडमधील लोकांकडून डोनेशन घेण्यासाठी २०१८मध्ये मुंबई पोलीस फाऊंडेशनची स्थापना करण्यात आली होती. या फाऊंडेशनमधील जमा झालेला पैसा पोलिसांच्या कल्याणासाठी वापरला जातो. त्यातूनच आता करोनाने दगावलेल्या पोलिसांच्या कुटुंबीयांसाठी आर्थिक मदत देण्यात येणार आहे. हा पैसा मृत पोलिसांच्या कुटुंबीयांच्या खात्यात ४८ तासांत ट्रान्सफर करण्यात येत असल्याची माहिती ज्वॉइंट पोलीस कमिश्नर नवल बजाज यांनी दिली. करोनामुळे मुंबईत आतापर्यंत चंद्रकांत पेंडुरकर, संदीप सुर्वे, शिवाजी सोनवणे, सुनील कारगुटकर, मुरलीधर वाघमारे, भगवान पार्टे, मधुकर माने आणि अमोल कुलकर्णी या पोलीस अधिकारी- कर्मचाऱ्यांचा मृत्यू झाला आहे.
