सांगलीः सांगलीतील कोव्हिड क्वारंटाइन सेंटरमधून दोन करोनाबाधित कैदी पळून गेल्याची घटना आज पहाटे घडली आहे. शहरातील लठ्ठे एज्युकेशन सोसायटीच्या वसतिगृहात असलेल्या कोव्हिड सेंटरमध्ये हा प्रकार घडला आहे. कोव्हिड सेंटरमधील खिडक्यांच्या काचा फोडून व गज तोडून या कैद्यांनी पलायन केल्यानं एकच खळबळ माजली असून कोव्हिड सेंटरच्या सुरक्षेचा प्रश्न पुन्हा एकदा ऐरणीवर आला आहे. गेल्या आठवड्यात या दोन्ही कैद्यांना दरोड्याच्या गुन्ह्यात अटक केली होत. त्यानंतर त्यांची पोलीस कोठडीत रवानगी करण्यात आली होती. तिथं त्यांची करोना चाचणी केली असता दोघांनाही करोनाची लागण झाल्याचं समोर आलं. त्यामुळं दोघांनाही कोव्हिड सेंटरमध्ये दाखल करण्यात आलं होतं. कैद्यांनी कोव्हिड सेंटरमधून पळ काढल्याचं समजताच पोलिसांनी जागोजागी नाकेबंदी करत त्यांच्या शोध घेण्यास सुरुवात केली आहे. कोल्हापुरात रुग्णसंख्या घटली कोल्हापूर जिल्ह्यात जूनपर्यंत करोनाचा कहर फारसा नव्हता. जुलै आणि ऑगस्ट महिन्यात करोनाने हाहाकार उडवला. या दोन महिन्यात जवळजवळ तीस हजारांवर बाधित आढळले. मृतांचा आकडा हजारांवर पोहोचला. यामुळे जिल्ह्यात प्रशासन आणि आरोग्य यंत्रणेची धावपळ उडाली. आठ दिवस मात्र जिल्ह्यात करोनाचा आकडा कमी होत आहे. पूर्वी रोज एक हजारावर बाधित आढळत होते. हा आकडा ५० टक्क्यांनी घटला आहे. जिल्ह्यात आतापर्यंत करोनाबाधित रुग्णांचा आकडा ४३ हजारांवर पोहोचला आहे. प्रशासनाने सुरू केलेली दंडात्मक कारवाई, जनजागृती, लोकांनीच घालून घेतलेली स्वयंशिस्त यामुळे हा आकडा कमी होत असल्याचे दिसत आहे. आत्तापर्यंत १३५४ जणांचा करोनाने बळी घेतला असून ३१ हजार ४७२ रुग्ण बरे झाले आहेत. सध्या ९६११ रुग्णांवर उपचार सुरू आहेत.
