मुंबई : चेतेश्वर पुजारा गेले काही दिवस वाईट फॉर्ममध्ये होता. पण मुंबईतील कसोटीच्या दुसऱ्या डावात पुजाराने दमदार फलंदाजी केली. त्याचबरोबर पुजाराने यावेळी अश्विनने दिलेलं चॅलेंजही पूर्ण केल्याचे पाहायला मिळाले. पण हे चॅलेंज पूर्ण करण्यासाठी पुजाराला तब्बल दोन वर्षे लागली. तब्बल दोन वर्षांनी पुजाराने कोणतं चॅलेंज पूर्ण केलं, पाहा...पुजारा हा एक तंत्रशुद्ध फलंदाज आहे. पण गेल्या काही सामन्यांमध्ये त्याच्याकडून चांगल्या धावा होत नव्हत्या. पण मुंबईतील कसोटीच्या दुसऱ्या डावात पुजाराने ४७ धावांची दमदार खेळी साकारली, ही खेळी साकारताना पुजाराने अश्विनचे चॅलेंज पूर्ण केले आहे. अश्विनने पुजाराला कसोटी क्रिकेटमध्ये षटकार लागवण्याचे चॅलेंज दिले होते. पुजाराने न्यूझीलंडचा फिरकीपटू एजाज पटेलच्या गोलंदाजीवर षटकार लगावत हे चॅलेंज पूर्ण केले आहे. पण एक षटकार लगावण्यासाठी पुजाराला तब्बल दोन वर्षे वाट पाहावी लागली. कारण यापूर्वी पुजाराने २०१९ साली दक्षिण आफ्रिकेविरुद्धच्या कसोटी सामन्यात षटकार लगावला होता. त्यानंतर दोन वर्षे त्याला एकही षटकार लगावता आला नव्हता. पण अखेर न्यूझीलंडविरुद्धच्या दुसऱ्या कसोटी सामन्यात पुजाराला षटकार लगावता आला आणि त्याने अश्विनचे चॅलेंज पूर्ण केले. अश्विनने कधी दिले होते पुजाराला चॅलेंज, जाणून घ्या...भारताचा संघ जेव्हा इंग्लंडच्या दौऱ्यावर गेला होता, तेव्हा अश्विनने पुजाराला षटकार ठोकण्याचे चॅलेंज दिले होते. आपल्या यु-ट्युब चॅनेलवर अश्विनने भारताचे फलंदाज प्रशिक्षक विक्रम राठोड यांना सांगितले होते की, "पुजाराने जर कसोटी क्रिकेटमध्ये षटकार ठोकला तर मी अर्धी मिशी काढून मैदानात खेळायला उतरेन." पुजाराने तर आता हे चॅलेंज पूर्ण केलं आहे, त्यामुळे अश्विन अर्धी मिशी काढून मैदानात उतरणार का, याकडे सर्वांचे लक्ष लागलेले असेल. पुजाराने हे चॅलेंज मुंबईतील न्यूझीलंडविरुद्धच्या दुसऱ्या कसोटी सामन्यात पूर्ण केलं आहे, त्यामुळे अश्विन याच सामन्यात अर्धी मिशी काढून मैदानात उतरणार का, याची उत्सुकता सर्वांनाच असेल. त्यामुळे या सामन्यात अश्विनवर सर्वांच्या नजरा खिळलेल्या असतील.
