मुंबई: अभिनेत्री कंगना रणौत आणि तिची बहिण सोशल मीडियावर अनेक कलाकारांवर सतत टीकेची झोड उठवताना दिसतात. पण आश्चर्य म्हणजे यावेळी रंगोलीनं बॉलिवूडच्या एका अभिनेत्रीवर चक्क स्तुतीसुमनं उधळली आहेत. अभिनेत्री दीपिका पादुकोण हिच्या वाट्याला ही स्तुती आहे. दीपिका पादुकोण हीची मुख्य भूमिका असलेल्या '' चित्रपटाचा ट्रेलर अलीकडेच प्रदर्शित झाला. हा ट्रेलर पाहिल्यावर रंगोली हिनं दीपिका आणि दिग्दर्शिका मेघना गुलजार या दोघींचं कौतुक केलंय. 'या चित्रपटामुळे मेघना आणि दीपिका खूप लोकांना अश्रू गाळायला भाग पाडणार आहेत आणि अॅसिड हल्ल्यासारखा इतका संवेदनशील विषय हाताळल्याबद्दल ज्यांच्यावर अॅसिड हल्ला झालाय अशा अनेकांचे आशीर्वादही त्यांना मिळणार आहेत. मी स्वत: आणि माझे कुटुंब या वेदनेतून गेलेलो आहोत. लोकांच्या नजरांचा सामना करणं यावेळी मृत्यूपेक्षाही अवघड वाटायला लागते. अॅसिड हल्ला झालेल्या अनेकांच्या कथा लोकांपर्यंत पोहोचवणे गरजेचे आहे. हा चित्रपट प्रेक्षकांना आवडेल अशी प्रार्थना मी करते' अशी पोस्ट लिहून तिनं चित्रपटाच्या टीमला शुभेच्छा दिल्या आहेत. रंगोली स्वत: अॅसिड हल्ल्यातून बचावली आहे. ती कॉलेजमध्ये असताना तिच्यावर अॅसिडनं हल्ला करण्यात आला होता. कॉलेजमध्ये तिच्या मागे लागलेल्या एका मुलाला तिनं लग्नासाठी नकार दिला. परंतु, रंगोलीनं दिलेला हा नकार तो मुलगा काही स्वीकारू शकला नाही. रंगोलीनं नकार देत अपामान केला असून त्याचा सूड उगवण्यासाठी त्या मुलाने तिच्या चेहऱ्यावर एक लिटर अॅसिड फेकलं होतं. या अॅसिड हल्ल्यानंतर रांगोलीच्या चेहऱ्यावर तब्बल ५४ शस्त्रक्रिया झाल्या आहेत. दरम्यान, 'छपाक' चित्रपट लक्ष्मी अग्रवाल या अॅसिडहल्ला पीडितेच्या आयुष्यावर बेतलेला आहे. हा चित्रपट १० जानेवारी २०२० ला प्रदर्शित होणार आहे.
